Dann béton

Dann béton

La kaz an tol té pa bon,

La kaz a nou dann béton.

La pa plant bon pe gazon;

Mèm la kour lé an béton.

Na do moun i viv an lèr,

Mé sé pa do moun an lèr.

Chak l'imèb sé in volièr.

Volièr en béton, en fèr.

Na marmay i kont si l'ékol,

Po ésèy prann zot l'anvol.

Nou dia zot travay l'ékol,

Parske san diplom lé mol.

Na bon pe i rod travay;

Chomèr la tèt i travay.

Mèm i wa la pèy lé fay.

Na bon pé i ve travay;

Chomaj sa lé konm inn chèn;

Bann ti kontra i anchèn.

La mizèr lé konm inn chèn;

Jénérasion i anchèn.

Po sak i ièm vèy télé;

Lo bann chèn lé par bouké.

Parabol, partou lé plin.

La komann lé dan nout min.

Na in pé i fum kaya.

I plane, i oubli traka.

Néna dot i bwar l'alkol.

Kan i redésann lé mol.

N'in pé lé pri su la kol;

I nway zot pèn dan l'alkol.

Na in pé i tourn an ron;

N'in pé i fé lo kouyon.

E tou lé jour dann béton,

I trap i mèt an prizon;

Pandan se tan gro patron,

La fine détourn bann milyon.

Fo pèy factur é lwayé

Fo l'arjan po achèt manjé.

Dann béton i giny pa planté.

Quelque part on s'est planté!

Sak i koné pi koué fèr

La détrès i plonm zot kèr.

Soman nout nasion lé fièr.

Na la volonté de fèr.

E si ou wa dann béton,

L'asanser sosial bloké,

Fo pa ou di lès béton,

Esèy pas par lèskalié.

Parske ou wa dann béton,

Sé ou ki dwa démèrdé.

Alor di pa lès béton,

Rézist konm béton armé.

                                    Teddy Gérard