Chomèr é travayèr

Chomèr é travayèr

I fo tourn sèt fwa nout lang

Dan nout bouch, avann kozé.

De janvié jiska désanm,

Na d'moun i di ninport koué.

Na dé fwa ou va antann,

« Kréol lé parès, oté. »

Alor mwin sak mi domann,

Kisa i sa travayé?

Dan tout loto i désann,

Kan solèy i vyinn lévé,

Gard ou mèm ou va konprann,

La plupar sé rényoné.

Chomaj i touch byin nout bann,

Na pwin travay po bon pé.

Mé bon pé i mont i t'sann,

I kontinué alé rodé.

Na chomèr i tyinbo ensanm,

Zot néna la volonté;

Alor arèt fé la lang,

Di pa lé parès, oté.

Juj pa sak i travay pa,

Sirman li na son rézon.

Sirtou si ou koné pa,

I fo pa koz an kouyon.

Ou giny le SMIC ou domann

Out patron po èt ogmanté;

Li di : « Na dot i atann,

Ou démisione kan ou vé.»

Ek le SMIC i fo konprann

Ke le budjé lé séré;

Lé pa bocou mie ke bann

Moun i touch san travayé.

Alor na in pé i domann,

Po koué ankor alé forsé?

Otan rès la kaz é prann

Ek l'éta le pti moné.

Sé lo sistèm ke i rann

Sertin moun mwin motivé.

Smic, RSA tout la bann

I ral lo diab par la ké.

Chomaj i touch byin nout bann,

Na pwin travay po bon pé.

Mé bon pé i mont i t'sann,

I kontinué alé rodé.

Chomaj in kalvèr po bann

Do moun i ve travayé.

Alor arèt fé la lang,

Di pa lé parès, oté.

                        Teddy Gérard