In kombatan la rès a tèr

In konbatan la rès a tèr

Na in ga la jèt son kor ièr,

Dan lèr in pon la ba Sin-Pièr.

La trouv son kor dan la rivièr,

Dé trwa liny rubrik fé divèr.

Dépi ièr na in fami i plèr.

Lo bann paran lo kèr i sèr.

Zot z'enfan jordi i entèr.

Riyin'k zot i koné zot doulèr.

Konsolasion dan la prièr.

Po lo bann frèr èk lo bann sèr,

La journé na in gou amèr.

Son bann dalon i pèrd in frèr.

Oté si ou lé solitèr,

Si out vi n'a in gou amèr,

Tyinbo ensanm, renfors out kèr.

In konbatan la rès a tèr;

Sé in solda ke lé mor ièr.

Non sété pa in militèr;

Sa gèr sété kont la mizèr.

Mi parl azot la mizèr lo kèr.

Pa riyin'k l'arjan na d'la valèr.

Dan nout kèr nana dot zafèr

Ki done le gou de viv, mon frèr!

L'amour ton fami, si la tèr,

E sat do moun ou konsidèr,

Sa lé inportan konm lumièr,

I nouri out l'espri, out kèr.

Ou ièm a zot, sé in nafèr.

Zot santiman sé in not nafèr.

Fo l'amour résiprok, an klèr,

Po vréman biny dan la lumièr.

Oté si ou lé solitèr

Si out vi n'a in gou amèr,

Tyinbo ensanm, renfors out kèr.

Oté mwin lé pa dévinèr,

Mé si li la jèt son kor ièr,

Dawar son vi té in l'anfèr.

Di pa sé la fami lotèr.

Kan ou san a ou si la tèr,

Konm in naufrajé an plèn mèr,

Ou in moun pèrdu dann dézèr,

I pe rann a ou suisidèr.

An plis l'amour na in nafèr,

I èd a nou viv si la tèr.

Sé kan ou koné si ou galèr,

Nana do moun lé solidèr.

Chakinn son fardo si la tèr.

Li lé mwin lour, oté mon frèr,

Kan na do moun lé solidèr.

Pans pa k'in l'aksion solidèr

Lé konm in gout lo dan la mèr.

Bann z'aksion do moun solidèr

Sé bann gout i form in rivièr.

La dan ou bwar, ou dézaltèr,

Kom in moun la swaf dann dézèr.

Gard la rivièr i mélanj astèr

Ek l'Ayin, la sours la lumièr.

                                                       Teddy Gérard